Jwaani Te Shaam Written by Mandeep Khanpuri

ਜਵਾਨੀ ਤੇ ਸ਼ਾਮ

ਮਿੱਟੀ ਤੋਂ ਬਣ ਕੇ ਬੰਦਾ  

ਸੋਨੇ ਦੇ ਦੇਖਦਾ  ਖ਼ਾਬ ਏ  

ਮੁਫ਼ਤ ਦੇ ਵਿਚ ਮਹਿਕਾਂ ਵੰਡਦਾ  

ਦਿਆਲੂ ਬੜਾ ਗੁਲਾਬ ਏ  

ਸਮੇਂ ਨਾਲ ਤੂੰ ਘਰ ਨੂੰ ਆ ਜਾ  

ਸਮਾਂ ਬੜਾ  ਖ਼ਰਾਬ ਏ  

ਦੂਜਿਆਂ ਦੇ  ਘਰ ਸਾੜਨ ਵਾਲੇ ਦੀ  

 ਦੌਲਤ ਜਲ ਹੀ ਜਾਣੀ ਏ  

 ਜਵਾਨੀ ਤੇ ਸ਼ਾਮ ਦੋਸਤਾ

ਢਲ  ਹੀ ਜਾਣੀ ਏ

ਬੰਦਾ ਮਰਦਾ ਯਾਦ ਨ੍ਹੀਂ ਮਰਦੀ  

ਵਾਅਦੇ ਤੇਰੇ ਸਾਰੇ ਫਰਜ਼ੀ  

ਕੁੜਤਾ ਤਾਂ ਅਸੀਂ ਸੀ ਲੈਣਾ ਏ  

ਫੱਟ ਨੀ ਸਿਉਂ ਦਾ ਕੋਈ ਵੀ ਦਰਜ਼ੀ  

ਸਾਡੀ ਤਾਂ ਕਦੇ ਸੁਣਦਾ ਨਹੀਂ 

ਵਕਤ ਵੀ ਕਰਦਾ ਆਪਣੀ ਮਰਜ਼ੀ  

ਕਾਗਜ਼ ਵਾਂਗੂੰ ਪਾਣੀ ਦੇ ਵਿੱਚ  

ਤੇਰੀ ਆਕੜ ਸੜ ਗਲ ਜਾਣੀ ਏ  

ਜਵਾਨੀ ਤੇ ਸ਼ਾਮ ਦੋਸਤਾ

ਢਲ ਹੀ ਜਾਣੀ ਏ

ਸੂਰਜ ਵੀ ਤਾਂ ਡੁੱਬਦਾ ਏ  

ਕੋਈ ਪੱਥਰ ਚੋਂ ਵੀ ਉਗਦਾ ਏ

ਕੋਈ ਪੰਛੀ ਦਾਣੇ ਖਾਂਦਾ ਏ  

ਕੋਈ ਕੀੜੇ ਵੀ ਤਾਂ ਚੁਗਦਾ  ਏ

ਜੋ ਮਹਿਲਾਂ ਵਿੱਚ ਸੋਹਣਾ ਲੱਗਦਾ ਏ  

ਕੱਚ ਪੈਰਾਂ ਵਿੱਚ ਵੀ ਖੁੱਭਦਾ ਏ

ਜੋ ਕੂੜੇ ਦੇ ਵਿਚ ਸੁੱਟ ਦਿੱਤੀ  

ਉਹ ਬੱਚੀ ਪਲ ਹੀ ਜਾਣੀ ਏ  

ਜਵਾਨੀ ਤੇ ਸ਼ਾਮ ਦੋਸਤਾ

ਢਲ ਹੀ ਜਾਣੀ ਏ